ಜೀವನ ಪೂರ್ತಿ ಮನಸ್ಸನ್ನು ಕರಗಿಸುವಂತೆ, ಯಾವುದೇ ಸಮಯದಲ್ಲಾದರೂ ಅದನ್ನು ನೆನಪು ಮಾಡಿಕೊಳ್ಳಲು ಸಂತೋಷಪಡುವಂತೆ ಮಾಡುವ ಘಟನೆ, ನೋಡಿದ ಚಿತ್ರ, ಓದಿದ ಪುಸ್ತಕಗಳು, ಕೇಳಿದ ಹಾಡುಗಳು "ಎಂದೂ ಮರೆಯಲಾರದ" ವಸ್ತುಗಳಾಗಿ ಸುಂದರ ನೆನಪುಗಳಾಗುತ್ತವೆ. ಯಾಕೆ?
ಯಾವುದೇ ಪುಸ್ತಕ, ವಿಚಾರ, ಹಾಡು ನಮ್ಮಲ್ಲಿನ ನಂಬಿಕೆ ಅಥವಾ ನಾವು ಅನುಭವಿಸಿರುವ ನಮ್ಮ ಯಾವುದೇ ಒಂದು ಗತ ನೆನಪಿಗೆ ಹತ್ತಿರವಾಗಿರುವಂತೆ ಇದ್ದಾಗ, ಆ ರಸಾನುಭವವನ್ನು ಪುನರಪಿಯಾಗಿ ನಮ್ಮ ಕಣ್ಣಿನ ಮುಂದೆ ತಂದಾಗ ನಮ್ಮ ಮನಸ್ಸು, ಆ ಸಮಯಕ್ಕೆ ಸಂತೋಷಿಸಿ ಆ ದಿನಗಳ ಮೆಲುಕು ಹಾಕಿ ಹಿಡಿಯಲಾರದಷ್ಟು ಖುಷಿಪಡುತ್ತದೆ.
ಹಾಗೆಯೇ ಯಾವುದೇ ನಾವು ಅನುಭವಿಸಿದ ಅವಮಾನ, ಕಷ್ಟ, ನಷ್ಟಗಳನ್ನು ನಿಜವಲ್ಲದ ಕಥೆಗಳಲ್ಲಿ, ಕಾದಂಬರಿಯಲ್ಲಿ ಅಥಾವ ಸಿನೆಮಾದಲ್ಲಿ ಬರುವ ಪಾತ್ರಗಳು ಅನುಭವಿಸುವುದನ್ನು ನೋಡಿದಾಗ ನಾವುಗಳು ಅದರ ಜೋತೆ ನಮ್ಮ ಅನುಭವಗಳನ್ನು ಜೋತೆ ಮಾಡಿಕೊಂಡು ಆನಂದಭರಿತರಾಗುತ್ತೇವೆ. ಆ ಕಥೆ, ಕಾದಂಬರಿ, ಹಾಡು ಪಾಡುಗಳು ಸಕತ್ ಆಗಿದೆ, ತುಂಬ ಚೆನ್ನಾಗಿದೆ ಎಂಬಂತೆ ನಮ್ಮ ನಮ್ಮ ನಡುವೆ ಮಾತಾನ್ನಾಡುತ್ತಾ ಅದನ್ನು ಬೇರೆಯವರೊಂದಿಗೆ ಹಂಚಿಕೊಳ್ಳಲು ತವಕಿಸುತ್ತೇವೆ.
ನಮಗೆ ಇಷ್ಟವಾದಂತಹ ಯಾವುದೇ ಲೇಖಕನ ಕೃತಿ, ನಿರ್ದೇಶಕನ ಸಿನಿಮಾ, ಕವಿಯ ಕಾವ್ಯ ಪ್ರತಿಯೊಬ್ಬರಿಗೂ ಯುನಿಕ್ ಆಗಿ ಇಷ್ಟವಾಗಲೇ ಬೇಕೆಂಬ ಸಿದ್ಧಾಂತವೇನು ಇಲ್ಲಾ. ಮತ್ತು ಅದು ನಿಜವಾಗಿಯೂ ಇಷ್ಟವಾಗಬಹುದು ಅಥಾವ ಇಷ್ಟವಾಗದೇ ಇರಬಹುದು.
ಆದ್ದರಿಂದ ಆ ಒಂದು ವಸ್ತು ಇಷ್ಟು ಜನಪ್ರಿಯವಾಗಿದೆ, ಚೆನ್ನಾಗಿದೆ ಎಂದು ಅಷ್ಟೂ ಮಂದಿಯ ಸರಾಸರಿಯಿಂದ ನಿರ್ಧರಿಸಲಾರಂಬಿಸುವಾಂತಾಗುತ್ತದೆ ಅಲ್ಲವಾ?
ನಮಗೆ ನಾವು ದಿನ ನಿತ್ಯ ಅನುಭವಿಸುವ ಯಾವುದೇ ಘಟನೆ, ನಡಾವಳಿ, ವಿಚಾರ, ಕಷ್ಟ, ಅವಮಾನ - ಸನ್ಮಾನಗಳು ಆ ಸಮಯಕ್ಕೆ ತುಂಬ ಮಹತ್ವವಾದದ್ದು ಎಂದು ತಿಳಿಯಲಾರದಾಗಿರುತ್ತೇವೆ.
ಅದೇ ವಿಚಾರಗಳನ್ನು ನಮ್ಮ ನೆಚ್ಚಿನ ಯಾವ ಬರಹಗಾರ, ಚಿತ್ರ ನಿರ್ದೇಶಕ ತನ್ನ ಕೃತಿಗಳಲ್ಲಿ ನಿರೂಪಿಸಿದಾಗ ತುಂಬ ಹೆಮ್ಮೆಯಿಂದ - "ನೋಡಾಮ್ಮ ಸೇಮ್ ಟೂ ಸೇಮ್ ಘಟನೆಯನ್ನು ನಾನು ಈ ಹಿಂದೆ ಕಂಡಂತೆ, ನಾನು ಅನುಭವಿಸಿದ ಭಾವನೆಗಳನ್ನು ಹೇಗೆ ಕೊಟ್ಟಿದ್ದಾನೆ" ಎಂದು ಎದೆಯುಬ್ಬಿಸಿ ಹೇಳಿಕೊಂಡು ಒಡಾಡುತ್ತಿರುತ್ತೇವೆ. ಹಾಗೆಯೇ ಆ ವಿಚಾರಗಳನ್ನು ಸಮಷ್ಠಿಗೆ ತೋರಿಸಿದ ವ್ಯಕ್ತಿಯನ್ನು ನಾವು ತುಂಬ ಗೌರವಿಸುತ್ತೇವೆ. ಅದು ಕಲೆಯಲ್ಲವೇ ಅದಕ್ಕೆ.
ಯಾವ ಒಂದು ಘಟನೆ ನಮಗೆ ಕೇವಲವಾಗಿ ಕಾಣುವಂತೆ ಇರುತ್ತವೂ ಅಂಥ ವಿಚಾರಗಳೇ ನಮ್ಮ ನೆಚ್ಚಿನ ಲೇಖಕರ ಸೃಜನಾತ್ಮಕ ಕ್ರೀಯಾಶೀಲತೆಯ ಮೂಸೆಯಲ್ಲಿ ಜನ ಮೆಚ್ಚುವಂತಹ ಉತ್ತಮ ಸಾಂಸ್ಕೃತಿಕ ಕಲಾಕೃತಿಗಳಾಗಿ ಮೈಲಿಗಲ್ಲುಗಳಾಗಿ ಯಾವಾಗಲೂ ಪುನಃ ಪುನಃ ರಸಸ್ವಾದದಿಂದ ಅನುಭವಿಸಿ ನಮ್ಮ ನೀರಸ ಜೀವನವನ್ನು ಬಣ್ಣದ ರಂಗಾಗಿ ನೋಡುವಂತೆ ಮಾಡುತ್ತವೆ.
ಅದ್ದರಿಂದ ಈ ಜೀವನದ ನಮ್ಮ ನಿಮ್ಮೆಲ್ಲಾರ ಸುತ್ತಲಿನ ನಮ್ಮ ಸೂಗಡಿನ ಚಿತ್ರಣವನ್ನು ಬೇರೊಂದು ದೃಷ್ಟಿಯಲ್ಲಿ ನೋಡಲು ನಮ್ಮ ಮಾನವ ಸಹಜವಾದ ಮನಸ್ಸು ದಿನಂಪ್ರತಿ ತವಕಿಸುತ್ತಿರುತ್ತದೆ.
ಯಾಕೆಂದರೆ, ನಮಗೆ ನಾವು ಎಷ್ಟೇ ಪರ್ಪೆಕ್ಟ್ ಆಗಿದ್ದರೂ ಬೇರೆಯವರು ಇದು ಹೀಗೆ ಎಂದು ತೋರಿಸಿಕೊಟ್ಟಾಗ ಜೀವನವನ್ನು ಬೇರೊಂದು ರೀತಿಯಲ್ಲಿ ನೋಡುವ ಮನಸ್ಸು ನಮ್ಮಲ್ಲಿ ಉದಯವಾಗುತ್ತದೆ.
ಅದಕ್ಕೆ ಇರಬೇಕು ನಮಗೆ ನಮ್ಮ ನಾಡಿನ ಲೇಖಕನ ಕೃತಿಗಳನ್ನು ನಮ್ಮದೇಯಾದ ಮಾತೃ ಭಾಷೆಯಲ್ಲಿ ಓದಿದಾಗ ಸಿಗುವ ಆನಂದ ಬೇರೆಯ ನಾಡಿನ ಅವರ ಸಂಸ್ಕೃತಿಯ ಬೇರೆ ಭಾಷೆಯಲ್ಲಿ ಓದಿದಾಗ ಸಿಗುವುದಿಲ್ಲ. ಕೇವಲ ಓದಿದೇ ಎಂಬಂತೆ ಹೇಳಬಹುದೇ ವಿನಾಃ ಅನುಭವಿಸಿ ಖುಷಿಪಟ್ಟೆ ಎಂದು ಯಾರು ಹೇಳಲಾರರು.
ಈ ಸಾಂಸ್ಕೃತಿಕ ಲೋಕ ಯಾವುದೇ ಕಲಾಕೃತಿಗಳು ಸುತ್ತಲಿನ ಆ ಭಾಗದ ಸೊಗಡನ್ನು ವಿಭಿನ್ನ ಶೈಲಿಯಲ್ಲಿ ಸುಂದರವಾಗಿ ಹೀಗೆ ಹೀಗೆ ಎಂದು ನಿರೂಪಿಸಿದಾಗ ಸುತ್ತಲಿನ ಜನ ಅದರಲ್ಲಿ ತಮ್ಮನ್ನು ತಾವು ಗುರುತಿಸಿಕೊಂಡು ಸುಖಪಡಲು ತವಕಿಸುತ್ತಾರೆ.
ಯಾವುದೇ ಕಾದಂಬರಿಯ, ಕಥೆಯ, ಕಾವ್ಯದ, ಚಿತ್ರದ, ಲಾವಣಿಯ, ಗಾದೆಯ ಮುಖ್ಯ ಆದರ್ಶ ಪಾತ್ರಗಳು ತಾವಾಗಲೂ ತವಕಿಸುತ್ತಾರೆ. ಅದಕ್ಕೆ ಇರಬೇಕು "ಜಗವೇ ಒಂದು ನಾಟಕ ರಂಗ" ಎಂದು ಹಿರಿಯರು ಹೇಳಿರುವುದು.
ನಾವುಗಳು ದಿನ ನಿತ್ಯ ಕಷ್ಟ - ಸುಖ, ಸತ್ಯ - ಸುಳ್ಳುಗಳ ಸರಮಾಲೆಯ ಪಯಣದಲ್ಲಿ ವಿವಿಧ ರೂಪಿನ ವಿವಿಧ ರೀತಿಯ ನಟನಾ ಚಾತುರ್ಯ ತೋರಿಸಲು ಕಾತುರರಾಗಿರುತ್ತೇವೆ. ಇದೇ ಅಲ್ಲವಾ ಜೀವನ ಜೀವಂತಿಕೆಯ ನಿಜವಾದ ಸೆಲೆ ಮತ್ತು ಬೆಲೆ!
